市中心高爾夫球場 - 左丁山

過往曼谷BTS車站，對行路有障礙人士（如坐輪椅、揸枴杖人士，或老年長者）極不友善，個個車站上落都有幾十級樓梯，令上述朋友望而生畏，呢次去，咦，發現唔知幾時開始，在一啲大站，已有「輪椅人士電梯」（簡稱輪椅升降機），例如Siam、Rajadamri、Asok等等，但Asok站（即Terminal 21，Sheraton，Westin所在地）就孤寒一啲，部輪椅升降機入口鎖住，要搵警衞開門入內，都幾煩，既然已有心益人咯，何必又要防止普通人士濫用呢？其實泰國人好有禮貌，守規矩，即使在人多嘅車站，極少人與輪椅客爭升降機位，車上乘客每見到老人家揸枴杖，不論老幼，立即起身讓座，比香港地鐵情況好好多，香港更有人在網上堅稱，為甚麼要讓座？此等人無教養，都費事同佢哋拗。

在Rajadamri車站向西望，就係皇家曼谷體育會（RBSC）之高爾夫球場兼跑馬場，佔地若莫等於快活谷馬場。沙田馬場內有彭福公園，快活谷馬場內有足球場，曼谷馬場內圍則是一個18洞高爾夫球場，翻查網上資料，此球場建立於1901年，已有117年歷史，媲美香港粉嶺高爾夫球場，當年係為泰國貴族與外國外交使館人員而設，而今則是上流社會象徵，入會極不容易，現有會員12,500人。當時泰皇朱拉隆功要建造一個現代國家形象，同意引入西方高尚體育活動──賽馬與高爾夫，首任會長就係俄羅斯駐泰國大使。

今天呢個馬場佔地90公頃，位於曼谷最昂貴商業、豪宅地區之內，地皮估值30億美元，只限於會員享用，新發財人士申請入會，隨時要排隊十幾二十年。一百年前呢幅地位於市郊（當時市中心在大皇宮，法政大學一帶地區），與現在不可同日而語。有人指呢個球場係「帝國主義在亞洲之最後堡壘！」冇法啦，傳統就是傳統，一般泰國人只係來此跑馬（每兩星期日一次），對球會之獨特性及貴族性，咁多年來，不見有甚麼反對聲音。

左丁山站在車站眺望曼谷馬場/高球場，忽發奇想，假設於1900年，港英政府批地畀一個香港高爾夫球會在銅鑼灣興建一個18洞球場，今日球場能否仍然存在呢？馬尼拉就有一個Manila Club高爾夫球場，位於商業中心區Makati，佔地44公頃，有18個洞，離香格里拉酒店不遠。左丁山曾有華僑招待，入去飲下午茶，呢位僑領話，若非二次大戰後市面不景，Makati位於市郊，無人問津，球會斷無可能買到呢幅地皮！咪係囉，香港粉嶺高球會之最大錯誤就係領導層在二次大戰前，冇向政府申請買咗幅地！