Executive日記——攀石王籌款買「機械腳」

昔日有「亞洲攀石王」、「包山王」美譽嘅黎志偉（見圖），係一名運動健將，可惜五年半前一場突如其來嘅車禍，令佢下肢癱瘓，被迫放棄成為全職運動員嘅夢想。不過，志偉並無因此而自暴自棄，仲希望可以分享自己嘅經歷，帶多啲正能量畀香港人。Kelly收到風，志偉將會喺今個周六舉行分享會，籌款購買「機械腳」，希望大家支持。

五年半前嘅車禍令志偉下半生以輪椅代步，但佢無意志消沉，無放棄運動，仲坐住輪椅攀石，經五年苦練，終於喺上年年底坐喺輪椅上用自己健壯嘅雙手拉動繩索，登上獅子山山頂，發揮無畏更無懼嘅「獅子山精神」。

雙手拉繩登獅子山

小妹知道，志偉一直好希望可以購買一套「機械腳」，重新站起來。近期志偉終於等到製造商嘅回音，但費用大約要三百萬元，並唔係一個小數目。志偉將會喺今個星期六，下午五點半至七點半喺金鐘港麗酒店舉行「敢想敢做˙挑戰極限」分享會，同大家分享自己嘅故事。今次活動嘅門票每張三百蚊，名額一百八十個，收益將會全數畀志偉去美國接受診治同購買「機械腳」。呢個分享會咁有意義，Kelly希望大家會踴躍支持啦！