Executive日记——攀石王筹款买「机械脚」

昔日有「亚洲攀石王」、「包山王」美誉嘅黎志伟（见图），系一名运动健将，可惜五年半前一场突如其来嘅车祸，令佢下肢瘫痪，被迫放弃成为全职运动员嘅梦想。不过，志伟并无因此而自暴自弃，仲希望可以分享自己嘅经历，带多啲正能量畀香港人。Kelly收到风，志伟将会喺今个周六举行分享会，筹款购买「机械脚」，希望大家支持。

五年半前嘅车祸令志伟下半生以轮椅代步，但佢无意志消沉，无放弃运动，仲坐住轮椅攀石，经五年苦练，终于喺上年年底坐喺轮椅上用自己健壮嘅双手拉动绳索，登上狮子山山顶，发挥无畏更无惧嘅「狮子山精神」。

双手拉绳登狮子山

小妹知道，志伟一直好希望可以购买一套「机械脚」，重新站起来。近期志伟终于等到制造商嘅回音，但费用大约要三百万元，并唔系一个小数目。志伟将会喺今个星期六，下午五点半至七点半喺金钟港丽酒店举行「敢想敢做˙挑战极限」分享会，同大家分享自己嘅故事。今次活动嘅门票每张三百蚊，名额一百八十个，收益将会全数畀志伟去美国接受诊治同购买「机械脚」。呢个分享会咁有意义，Kelly希望大家会踊跃支持啦！