美食不分平貴，最重要好味，還有我們輪友一定要方便，今次介紹給大家是一間有四十年歷史嘅利口福快餐店，位於太子界限街43號地舖，小店一間，位於小巷旁邊，擺放幾張枱，對輪友很方便。十分親民咩都有得食，飯、麵和小食，不過最出名都係漢堡包和珍寶沙嗲牛肉包，很多人慕名而來。好啦馬上order 兩個包，試食完話你知味道如何？
講到咁好味，第一個要試是流心芝士豬扒包，豬扒即叫即炸，外表平平無奇，見唔到啲芝士，不過一切開，啲芝士即刻好澎湃咁流晒出嚟，食嗰陣記得小心唔好辣親呀！
芝士流出嚟個吓十分吸引，入面啲足料沙律醬，加埋芝士一齊食確係邪惡，但食落一啲都唔覺得膩喎！
豬扒炸到鬆脆香口，但又唔會感覺乾，肉質仲保持到鮮嫩有肉汁，十分難得呀！
珍寶沙嗲牛肉包賣相吸引，麵包鋪上滿滿牛肉，份量絕不欺場，食第一口就出事喇，好味到簡直覺得無包能及！
沙嗲牛肉大大塊同包嘅比例係一比一，每一口都可以食到牛肉，加上洋蔥同沙嗲汁，真係絕配！沙嗲汁帶少少微辣，食落好惹味！
食左兩個包一定很想飲嘢？這兩個包餐包飲料，凍飲加2元
想食到好味漢堡包又多一個選擇，好似呢間平民小店，同樣可以食到好好味的漢堡包，另外這裡招牌三文治及西多士都好好味。港式快餐店有獨特的吸引力及人情味，香港人一定要支持。