大家好嗎？冇見咁耐，有冇掛住我呢？呢排好忙呀，所以冇辦法每個星期都大家出去食好西添，真係唔好意思！(T_T)不過今日呢？想同大家分享一間連落單都要用英文嘅西餐，係咪好似好高檔咁呢？仲等咩呀？快啲跟住嚟啦！
呢間叫Pici嘅意大利餐廳全港目前得五間，小妹我今次就同大家嚟沙田新城市廣場度做下白老鼠啦！我個人比較鍾意佢個裝潢，除咗內部空間夠哂闊之外，仲好有歐陸風格，等客人好似置身於意大利咁！更值得Like嘅唔單止係佢嘅裝潢，餐廳入面嘅侍應大部分望落去都似外籍人士，所以無論係入座、落單定埋單都需要用英文溝通。不過你如果真係唔識講都唔緊要，餐牌上面有中英對照，落單嗰陣指比侍應睇，佢哋都明嘅！而服務態度絕不輸比本地人㗎喎，甚至有種賓至如歸嘅感覺㗎，佢哋一見到我係電輪友，都好主動友善安排我入座，仲問我o唔ok添！入座之後個侍應會用英文問你：「你有冇喺度食過？」如果答冇嘅話，侍應就會主動向你簡易解釋個餐點嗌法，非常貼心㗎！
戲肉嚟啦，嘢食方面呢……我嗌咗個B Set，前菜揀咗秘制肉丸；主食揀咗意大利寬麵；甜品揀咗Tiramisu，當然前菜嚟之前會有個餐湯同餐包啦，個包雖然有啲硬，但係如果你學習西人食法(將個包搣開一舊舊，點埋啲湯食)，簡直係絕配。
跟住就係個肉丸，我真係冇諗會係咁大粒，上面仲有好多芝士碎添！作為芝士控嘅朋友仔，真係見到都流哂口水啦！再嚟就係個主食(意大利寬麵)，雖然佢個麵啲配類落咗莞茜同青口比我扣咗少少分，但係勝在有大蒜救返哂成碟麵，大蒜個香味遮蓋咗少少莞茜嘅「香味」同青口嘅「鮮味」，如果你剩係食莞茜同青口嘅話，個味又會出返哂嚟㗎喎，係咪好特別呢？最後係個甜品，個Tiramisu可能因為呢間係意大利餐廳嘅關係，所以特別好食！食Tiramisu最驟忌就係下面嗰層蛋糕唔夠creamy，搞到成個Tiramisu好乾咁！但係我可以同大家講呢間嘅Tiramisu做到入口即溶效果，所以真係好好食！
鍾意食西餐嘅你，仲等咩呀？仲唔快去試下？我哋下次再見啦！<3
餐牌有中英對照，真係唔識講英文嘅話，可以直程指比侍應睇
充滿芝士碎嘅秘製肉丸，作為芝士控嘅你，點可以錯過呀？
「大蒜救全家」呢碟意大利寬麵就做到啦！都係頂唔順莞茜味？可以揀其他主食，可能仲啱你㗎！
正宗嘅Tiramisu係要做到入口即溶效果，呢間意式餐廳就做到呢個口感!