大家好嗎？最近我比較忙，冇時間寫Blog，所以隔咗兩個星期先寫返！好啦，我哋繼續去搵食lu！
相信好多人間唔中都會落樓下嘅茶餐廳飲啖野，食個麵當一餐㗎啦？而今次我就係要帶大家嚟禾輋食茶記早餐，「喂！唔係呀話，瞳瞳又揸流攤？」唔係呀，有樣野值得去食㗎仲好抵食添！
佢咪就係喺禾輋商場二樓嘅和平餐室囉，嗰度嘅裝潢有少少復古嘅味道，交通算幾方便，住沙田市中心嘅話可以經瀝源同好運中心嗰條天橋都通到去禾輋商場㗎！因為我今日主題係早餐，所以剩係forcus喺早餐個餐牌度，當然佢啲晏晝、下午茶、晚市都抵食啦！只不過佢個早餐真係令人留下好深刻嘅印象啫！點深刻法？咁就係我跟住落嚟嘅重點啦！
內部裝潢復古，帶少少冰室嘅味道
早餐餐牌，真係幾多選擇㗎！簡直係平、靚、正！
我嘅重點推介就係佢啦──「自家香辣肉碎米粉」，唔食得辣嘅話其實都仲有好多選擇嘅，包括雜菜羅宋湯粉等等都好抵食，重點係好食嘛！
等我講下呢個「自家香辣肉碎米粉」有咩咁靶炮啦，佢除咗可以比你轉其他麵類之外，佢個調味帶辣得嚟又帶少少麻，個味直頭係出面完全食唔到嘅，夠哂獨家，食嘅時候建議連埋啲牛肉碎一齊食，個口感層次再升grade，真係好好食㗎，鍾意食辣嘢嘅你，唔試就真係走寶嘞！至於唔受得辣嘅朋友仔，正話個雜菜羅宋湯粉應該都適合你，湯粉都可以轉其他麵類㗎，小妹我呢？就轉咗意粉，可以話比大家聽一向細食嘅我，個粉令到我唔經唔覺食哂，可想而知有幾好食？相信大家都幻想到！咁樣兩個麵大家可能會諗起碼都要一舊水，我話你知咁樣兩個麵嘅set breakfast包埋嘢飲，一百蚊...........有找，抵食到呢！
好，今日就去到呢度，我哋下星期再見！記住繼續痴實我啦！
小妹我轉咗辣肉碎公仔麵，同樣咁好食㗎！
個餐包嘢飲同腸仔配煎蛋，再加個餐包添！
食完埋單都唔洗一舊水！抵食