隱世串燒場

今次要帶大家嚟大埔汀角路龍尾村101號嘅「巴希雅海灣重慶燒烤」食串燒。個場都幾大㗎，我諗有一個大型足球場咁上下大啦；交通方面雖然比較偏僻，但一樣有巴士到㗎；驚落雨淋濕哂冇得燒？唔會，職員會視乎天氣狀態去開啲帳篷，等大家唔會因為天氣嘅關係而掃興㗎，認真貼心！大家要注意嘅係廁所同地面，場內只有一個無分男女嘅廁所係方便到輪友人士，仲要唔係易達洗手間嚟添，小心入口個地面唔係好平喎，呢度就扣咗少少分，但係冇傷肝！我喺度建議各位朋友仔最好喺接近黃昏或日落前嚟，咁樣可以欣賞埋一望無際嘅無敵大海景同日落，個景真係乜都抵返哂啦，啱哂鍾意打卡嘅你㗎！

戲玉嚟啦！到底呢間嘢咩玩法㗎？我簡單介紹下啦！大家謹記入場起計三粒鍾，呢三粒鍾入面係任燒任食嘅，邊食邊燒邊傾下偈兼影下相，時間就慢慢流逝㗎啦！食完嘅竹籤可以放喺專係棄置垃圾嘅筒入面，定時定候就有人幫你清㗎啦！然後就係飲品方面要認真啲揀，因為每人只包一支嘢飲，飲完想再拎？就要額外收費，有部分飲品都係要加錢，所以拎之前最好就係問吓當值職員先啦！鍾意有飯後甜品嘅你可能會有少少失望，要自己貼錢㗎！你問我有咩值得推介？我會將個焦點放喺主食同水果環節度。

先嚟主食，身為芝士控同蒜蓉迷嘅你，絕對唔可以錯過嗰度嘅芝士丸同蒜蓉包！先講下個芝士丸，燒熟之後千祈唔好即刻食，因為你咬落去真係有芝士溶落你個口度就會「辣」親，建議擺佢一陣，等到佢出面塊皮暖暖地偏向凍應該差唔多食得，個芝士味非常濃郁，口感仲幾得意下㗎；個蒜蓉包，職員已經預先「查」咗牛油同蒜蓉上個包度，建議燒塊包嘅時候專心啲，燒到個麵包肉啡啡地就可以開始轉另一邊嚟燒，否則就會燶哂㗎啦！當然，唔係呢兩樣嘅愛好者都有其他選擇，而且種類繁多。

最後就係水果，你要攜券去拎水果，個職員就會比相應數量嘅菠蘿同香蕉你返去燒，只限一次㗎咋！舊菠蘿燒完之後，雖然帶少少酸，但係嗒耐啲個甜味其實好出㗎；香蕉呢，要連皮燒......燒到成塊皮黑色，之後拎去搵職員幫你劏開條蕉再落朱古力漿，簡直係為條蕉錦上添花㗎！(>0<)

好！今日就講到呢度，想睇返我上幾次推介過邊間餐廳？跟住落嚟又會介紹邊間？咁就要繼續跟住我啦，我哋下星期再見！