啱啱過咗個國慶，大家無論有冇出去玩都好，記得注意安全呀！希望大家都安全無癢啦！
上幾次都介紹咗日式小店餐廳比大家，有冇真係去食先？係咪真係冇介紹錯先？今日就嚟個新突破啦！我哋去韓燒！間餐廳喺邊度？夠唔夠無障礙？我哋e+即刻出發！
呢間係喺石門京瑞廣場一期二樓嘅「漢和韓國料理」。雖然裝潢普通咗少少，但勝在佢無論喺交通、洗手間、內部通道方面都大獲好評㗎，距離港鐵站好近，十分方便！唔好睇小入面啲職員個個都大媽咁款喎，佢地對每個食客都好似對自己嘅仔女一樣咁體貼㗎，食到好似返咗屋企咁！
個內部裝潢普通，但勝在通道夠哂闊！
嘢食方面，就睇吓想食好西嘅你，係晏晝食lunch？定係夜晚食dinner啦！點解？因為晏晝同夜晚個餐都唔同。呢度特別講多少少啦！
話說我第一次去食係同我「姊妹」一齊去食，佢都係輪椅人士嚟嘅！入去之前，個counter姐姐會比你揀食套餐定係韓燒，咁我哋就揀咗食套餐嘅！啲「阿媽」知道有兩個輪椅之後，都nice咁安排我哋兩個入座，絕無怨言㗎，仲講低咗點樣叫法添！佢話：「你哋諗好咗食乜之後，可以喺個order紙度落單，落完舉手比我哋就得㗎啦，想睇吓咩樣嘅話可以睇吓張枱有張大膠卡，有得睇圖嘅，有唔明再問呀！」
我哋叫咗五分鐘左右，個餐就嚟咗......就係最左邊呢個鍋燒雞肉飯，個餐連埋韓式湯同前菜都係五十蚊咋！咁大鍋飯，連埋啲「濕升」嘢五十蚊，一個字「抵」！除左抵之外，都真係幾好食，你可以早少少倒佢比你嗰兜甜豉油，令到個鍋底啲飯變飯焦㗎！鍾意食飯焦嘅朋友，仲可以再燒耐少少先撈起啲飯，咁就會有更多飯焦可以食！(P.S：其實鍾唔鍾意食飯焦嘅朋友都應該要試吓，小妹我係唔鍾意食飯焦都覺得好好食！)跟住…我已經唔記得咗我朋友係食啲乜lu，嗰次好食到停唔到口，所以冇乜影到相！(>_<")
嗰次食完之後過咗一至兩個月，我就推薦我屋企人一齊去試吓食dinner，因為晚市剩係得韓燒，所以都入咗去試，嗰陣都算係滿懷期待嘅！個侍應哥哥仲應得我，好窩心呀～！
結果？梗係冇失望而回啦！燒得與唔燒得、甜品與熟食、魚生，仲有朱古力噴泉，嘢食嘅種類激多㗎！令我印象最深嘅就梗係非牛奶奶凍莫屬，佢除咗好「動L」、口感滑溜之外，個奶味仲激重添，去到食嘅你真係唔可以錯過！
「咁就完啦？」係呀！想知我下次仲有咩新突破？會帶大家去邊度食好西？就要密切留意我下星期嘅blog啦！