請放心，本篇文章絕對唔係閃光文。
本年情人節，毫無拍拖情結嘅小妹陪伴父母溫馨過節。
父母好樂意小妹飾演「十萬伏特電燈膽」角色，於是我哋三人同行出去飯晚飯。
食過無乜特別嘅晚飯後，家父興致大發咁話：「不如我哋過去隔離食糖水吖！」
當我仲嚮到諗緊「食邊間糖水？」，家父就已經嚮義順牛奶公司門口停低咗。
小妹見識淺薄，未曾試過呢間聞名已久嘅名店。不過，此店劣評如潮，賣點在於「串爆趕客」，卻是略有所聞。
小妹心情瞬間跌落谷底。使用輪椅代步嘅我，做好會受不友善待遇嘅心理準備，萬念俱灰咁畀家父推入店內。
店員果真向小妹投以不友善嘅目光。小妹心諗「死喇，一定會被即刻趕出去」，點知成件事完全無發生。
【隨心小拍】
義順牛奶自家商標，好富當代特色。
小妹運用駕駛經驗 ( 今日係手推輪椅 ) 泊好車，務求令店員顧客都路路暢通，然後就開始陪父母嗌甜品。
冬春之間，熱飲熱食自然係最佳選擇。
熱愛傳統風味嘅小妹，對於各種 fusion 口味實在不甚感興趣。
因此，小妹嗌咗最正路、味道最有信心保證嘅「馳名雙皮燉奶」。
餐牌上面嘅價錢，小妹認為「一分錢一分貨」，家父就大嘆「真係好貴」。
大快朵頤之前，展示一下店舖格局先。
唔敢近距離影店員相，好驚畀人打。
相片中黑衣及紅衣人乃小妹父母。
家父嘅「巧手薑汁燉鮮奶」首先上檯。
坐等自己嗰份期間，聆聽嘴刁父母憶述過去幫襯義順故事。
原來，馳名「串爆趕客」嘅係佐敦店，唔怪得我今日嚟油麻地店會無事。
無統計過等待所需時間，閒談之間小妹嘅「馳名雙皮燉奶」就到咗。
奶味香濃無比，甜味恰到好處。( 個人感覺 )
質感似豆腐花。小妹覺得無乜所謂，不過家父就對此怨聲載道。
臨別之際，小妹希望「一笑解冤仇」，所以向店員報以燦爛微笑，並加一句「唔該曬」。
勢估唔到，店員竟然以笑容回報，小妹頓時感到幸福無比。
相信店員其實祇係初時誤以為「輪椅會撞爛店入面嘅嘢」。惟盼將來「誤會不存在，世界更可愛」。