渣马10公里轮椅赛用全新路段 鼓励伤健人

港人每年必跑嘅渣打马拉松，下个月18号开始接受报名喇！黛安知道，大会今届首次试行「伤健人士名额」制，将预留500个名额畀伤健人士，抽签亦会同公众分开，增加伤健人士出赛10公里、半马或全马赛事嘅机会；而大会仲安排领跑员喺抽签后先报名，视障人士就唔使担心领跑员会唔中签，有关安排好贴心啊。

要达到伤健共融，一条细心嘅赛道都好重要。听公关姊妹讲，今年10公里轮椅赛就会采用全新跑綫，由湾仔运动场起步，经杜老志道往龙和道，并喺龙和道与添华道之间绕两个圈，最后就会喺维多利亚公园冲綫，成条赛道更加平坦，参赛者自然更易争取佳绩；今届参赛时限仲由50分钟增至65分钟，兼可用一般手动竞赛轮椅参赛。

公关姊妹仲话，留意到好多人都锺情参与「家庭跑」，所以决定推出全新嘅赛规，欢迎一家大细、或者三五知己组队齐齐跑800米赛事，每队限2至4人参加。而家庭跑赛事会比主赛事早一日举行（即明年2月8日），并会用维园嘅冲綫区做起点同终点，打卡够晒气氛。

至于最多人想参加嘅全马赛事，今年名额会再加1,500个，总共可畀2.4万个健儿一齐作赛；主要赛事总名额夹埋有成7.4万个，相信可以满足到各位跑步健儿了，报名详情可以去www.hkmarathon.com查询同浏览。