中环IFC外望——滙丰力撑无障碍 荃湾分行做先锋

银行业界一向好支持推行无障碍服务，银行公会就联同存款公司公会，喺三月就此发出指引，畀同业参考。滙丰今年作为银行公会嘅主席银行，自然责无旁贷，要做个好榜样，所以就全情投入做好呢件事，更以滙丰荃湾分行做先头部队。

滙丰荃湾分行嘅无障碍银行服务都几全面㗎，包括方便轮椅使用者同行动不便者出入嘅永久斜道，亦有附设召援钟嘅自动门。分行明显标示主要无障碍设施嘅位置，并开辟咗安全通道；又为有需要人士设有低桌面柜枱或低桌面会客室。

该行同时设有方便视障人士嘅语音导航，兼可显示较大字体嘅自动柜员机（ATM），兼且调校咗ATM嘅高度，方便轮椅使用者揿钱。唔单止咁，滙丰仲提供埋凸字月结单，呢个相信都系全港首创。

滙丰港区一姐施颖茵仲话，计划未来三年喺全线约100间分行，逐步实施无障碍银行服务，并喺今年底将支援语音导航功能嘅ATM，增加至250部，未来三年呢项功能将会覆盖到全部ATM。佢又话，为咗向有需要客户提供支援，该行仲特设咗178名社区关爱大使O添。

主席失联 蓝鼎急插35%停牌

内地资金紧张，后遗症就系上市公司主席一个又一个唔见人。好似蓝鼎国际（582）噚日急插35%突然停牌，然后蓝鼎发出公告，话公司自噚日起未能接触仰智慧，正尝试联络，董事会将会评估对公司影响。蓝鼎停牌前报3.76元，市值仍然超过一百亿元，规模有番咁上下，所以仰智慧去向如何，都可谓备受关注。仰智慧系财技高手，蓝鼎市值高峰期曾接近五百亿元，仲入埋港股通O添。

无独有偶，早前遭证监会勒令停牌嘅瑞年国际（2010），星期三都发通告，话旗下嘅无锡瑞年实业，因涉嫌触犯非法吸收公众存款罪，俾无锡市公安局调查，公安局并对公司主席王福才实施刑事强制措施。因此，瑞年管理层团队未能联络王福才。瑞年国际亦都俾沽空机构Glaucus发表过报告狙击，瑞年提出诉讼反击，最终双方和解，Glaucus同意唔再评论瑞年。点知过到初一过唔到十五，都系要惹上官非。

上市公司主席行踪咁飘忽，唔怪得知好多市场人士都话，O依家投资细价股要格外留神至得。