中環IFC外望——滙豐力撐無障礙 荃灣分行做先鋒

銀行業界一向好支持推行無障礙服務，銀行公會就聯同存款公司公會，喺三月就此發出指引，畀同業參考。滙豐今年作為銀行公會嘅主席銀行，自然責無旁貸，要做個好榜樣，所以就全情投入做好呢件事，更以滙豐荃灣分行做先頭部隊。

滙豐荃灣分行嘅無障礙銀行服務都幾全面㗎，包括方便輪椅使用者同行動不便者出入嘅永久斜道，亦有附設召援鐘嘅自動門。分行明顯標示主要無障礙設施嘅位置，並開闢咗安全通道；又為有需要人士設有低桌面櫃枱或低桌面會客室。

該行同時設有方便視障人士嘅語音導航，兼可顯示較大字體嘅自動櫃員機（ATM），兼且調校咗ATM嘅高度，方便輪椅使用者撳錢。唔單止咁，滙豐仲提供埋凸字月結單，呢個相信都係全港首創。

滙豐港區一姐施穎茵仲話，計劃未來三年喺全線約100間分行，逐步實施無障礙銀行服務，並喺今年底將支援語音導航功能嘅ATM，增加至250部，未來三年呢項功能將會覆蓋到全部ATM。佢又話，為咗向有需要客戶提供支援，該行仲特設咗178名社區關愛大使O添。

主席失聯 藍鼎急插35%停牌

內地資金緊張，後遺症就係上市公司主席一個又一個唔見人。好似藍鼎國際（582）噚日急插35%突然停牌，然後藍鼎發出公告，話公司自噚日起未能接觸仰智慧，正嘗試聯絡，董事會將會評估對公司影響。藍鼎停牌前報3.76元，市值仍然超過一百億元，規模有番咁上下，所以仰智慧去向如何，都可謂備受關注。仰智慧係財技高手，藍鼎市值高峰期曾接近五百億元，仲入埋港股通O添。

無獨有偶，早前遭證監會勒令停牌嘅瑞年國際（2010），星期三都發通告，話旗下嘅無錫瑞年實業，因涉嫌觸犯非法吸收公眾存款罪，俾無錫市公安局調查，公安局並對公司主席王福才實施刑事強制措施。因此，瑞年管理層團隊未能聯絡王福才。瑞年國際亦都俾沽空機構Glaucus發表過報告狙擊，瑞年提出訴訟反擊，最終雙方和解，Glaucus同意唔再評論瑞年。點知過到初一過唔到十五，都係要惹上官非。

上市公司主席行蹤咁飄忽，唔怪得知好多市場人士都話，O依家投資細價股要格外留神至得。