《经济通》办无障画创大赛鼓励伤健人士融入社会

艺术系一项强而有力嘅媒介，拉近人与人之间嘅距离，消除沟通障碍。黛安没有艺术细胞，但就十分佩服从事艺术的人，同埋全力支持推广艺术的机构。黛安昨日出席咗由《经济通》同社创SoIN举办嘅「无障画创大赛」颁奖典礼。由于参加比赛嘅画家都系伤健人士，当宣布得奖者时，现场都掌声雷动。

呢个比赛系鼓励伤健人士积极融入社会，发挥佢哋嘅创作才华同潜能，藉艺术推广无障碍社会和伤健共融的理念。主催呢个咁有意义嘅活动系《经济通》董事总经理史秀美（Salome），佢仲搵到团结香港基金支持，信和集团赞助，大家都好有心，出钱出力。

评判之一，本港知名建筑师又系画家嘅冯永基教授，佢嘅画作被香港和世界好多艺术馆收藏，佢都同黛安讲，今次参赛作品质素不错。

讲番颁奖结果，季军系刘志强嘅《爱中绽放》，佢患有罕见病，生命随时会结束，佢话呢幅画作正是表达佢正在生死边缘上，而太太不离不弃的照顾佢、支持佢画画。

而获得亚军嘅《桥底》系谭敏玲喺桥底花咗两个半月画出所思所想、所见所闻嘅作品，佢话在桥底内见到许多有心人去帮助那里的人，令她感动。

冠军陈旭麟嘅作品《不一样的轮椅》，描绘嘅正系佢自己，佢四肢不能灵活活动，轮椅系佢生命中一个重要部分。因为父母想佢可以活动自由，就买咗呢张轮椅，亦因为呢张轮椅，佢可以学影相、画画，难怪佢以轮椅友爱做主题。

黛安听Salome讲，搞呢个活动系希望将得奖嘅艺术作品变成商品，延续艺术作品嘅生命力，最终希望让画家透过艺术创作可自力更生。

得奖作品由今日起至5月22日喺PMQ元创方A座S201室展出，5月24日至6月4日就移师至荃湾Citywalk荃新天地2期地下中庭，有兴趣嘅姊妹唔好错过。