《經濟通》辦無障畫創大賽鼓勵傷健人士融入社會

藝術係一項強而有力嘅媒介，拉近人與人之間嘅距離，消除溝通障礙。黛安沒有藝術細胞，但就十分佩服從事藝術的人，同埋全力支持推廣藝術的機構。黛安昨日出席咗由《經濟通》同社創SoIN舉辦嘅「無障畫創大賽」頒獎典禮。由於參加比賽嘅畫家都係傷健人士，當宣布得獎者時，現場都掌聲雷動。

呢個比賽係鼓勵傷健人士積極融入社會，發揮佢哋嘅創作才華同潛能，藉藝術推廣無障礙社會和傷健共融的理念。主催呢個咁有意義嘅活動係《經濟通》董事總經理史秀美（Salome），佢仲搵到團結香港基金支持，信和集團贊助，大家都好有心，出錢出力。

評判之一，本港知名建築師又係畫家嘅馮永基教授，佢嘅畫作被香港和世界好多藝術館收藏，佢都同黛安講，今次參賽作品質素不錯。

講番頒獎結果，季軍係劉志強嘅《愛中綻放》，佢患有罕見病，生命隨時會結束，佢話呢幅畫作正是表達佢正在生死邊緣上，而太太不離不棄的照顧佢、支持佢畫畫。

而獲得亞軍嘅《橋底》係譚敏玲喺橋底花咗兩個半月畫出所思所想、所見所聞嘅作品，佢話在橋底內見到許多有心人去幫助那裏的人，令她感動。

冠軍陳旭麟嘅作品《不一樣的輪椅》，描繪嘅正係佢自己，佢四肢不能靈活活動，輪椅係佢生命中一個重要部分。因為父母想佢可以活動自由，就買咗呢張輪椅，亦因為呢張輪椅，佢可以學影相、畫畫，難怪佢以輪椅友愛做主題。

黛安聽Salome講，搞呢個活動係希望將得獎嘅藝術作品變成商品，延續藝術作品嘅生命力，最終希望讓畫家透過藝術創作可自力更生。

得獎作品由今日起至5月22日喺PMQ元創方A座S201室展出，5月24日至6月4日就移師至荃灣Citywalk荃新天地2期地下中庭，有興趣嘅姊妹唔好錯過。