哈囉！好多謝Freeguider喺Facebook度幫手宣傳我呢個輪友博客！唔知有冇新朋友仔呢？想睇返我之前介紹過邊間無障礙又好食嘅餐廳？可以關注我㗎！事不宜遲，一如以往嘅每週一好西……馬上出發！(>v<)
今次要帶大家嚟沙田新城市廣場喺一期七樓嘅「道頓堀御好燒專門店」。「御好燒？咩嚟㗎？」想知道嘅你繼續跟住我啦！沙田新城市廣場應該唔洗多講，每時每刻都咁多人，覺得好難搭lift？教大家一個short cut啦，喺平時搭嘅普通lift後面有部直達七樓嘅lift，搭嗰架包你十秒內上到去，非常快捷方便！至於間嘢……個空間算幾闊落，個裝潢好日本feel，所以都幾靚嘅！
好！戲肉嚟啦，下面呢舊類似燒餅嘅物體就係御好燒啦！「吓？黑忟忟，好唔好食㗎？個廚師唔記得睇爐呀？」你以為真係咁咩？錯哂！舊御好燒係由你自己落手落腳整嘅，啲職員只係會執齊啲材料比你、解答你嘅問題、教埋你整pancake嘅啫！ 「吓？如果解答完都唔識整呢？點算呀？」唔緊要，每枱都有張每款燒餅嘅教學，包括御好燒、廣島燒、文字燒同pancake等等！佢哋都有唔同嘅整法㗎！當然，你都可以自己加啲創意落去等舊餅再好食啲啦！對煮嘢食有興趣嘅你，係時候要郁手啦！
先講下一般嘅御好燒點整，首先將碗入面嘅嘢撈暈，唔鍾意食日本薑嘅朋友可以叫整嗰個將啲薑舀上爐度「顏」碎少少，之後再放返落碗度撈一撈，咁樣會容易入口啲。之後將撈好咗嘅料舖上爐度，記得要整返靚個餅嘅形狀呀，如果唔係個賣相就唔好睇㗎啦！呢個時候要叫等食嗰個教鐘──五分鐘，每邊要做兩次。當最後一次嗰陣，要留返啲空間打蛋，然後將塊餅放上隻蛋度，再反一反佢燒多一陣，就食得㗎啦！都係唔識整？可以用手機掃一掃QR code睇片，即學即整啦！話簡單唔簡單，話難唔難㗎！但係自己落手落腳整比自己食，抑或整比你最愛嘅人食，其實嗰種喜悅同成功感，你用錢係買唔到嘅！
好！今日就講到呢度先，你仲唔快啲去試下整塊比你最親嘅人食？等佢窩心一下嘛！
最後送上自家制嘅pancake，等大家葡萄下先！我哋下星期再見嘞~！<3