余翠怡：残奥、奥运项目唔同，根本无得比较，亦唔需要比较

张家朗夺金后，网上有讨论话张家朗系香港历黎第二金，有人话苏桦伟先系第二金，然后就「热烈讨论」奥运，残奥点计，运动员待遇等等。

作为残奥运动员，见到家朗夺金，系超．开．心！因为本身认识佢，见佢有好成绩，即使我地唔系同一个项目（轮椅剑击同剑击系有唔同嘅）一定为佢而高兴。

因为，我地都系 #香港运动员。

其实，我地都系一同喺体院训练，大家成日会见面，我好锺意睇奥运唔止系热爱运动，系因为我好想支持我一班「香港队队友」。见到石伟雄初赛受伤，我会即时问佢队友情况系点，见到谢影雪铜牌战后访问，我都会想喊；就正如我要去残奥比赛，备战其间有健全剑手喺佢地一些训练时间，特别为我地坐喺轮椅上一齐练习一样，我地互相都会支持大家。

有人会觉得残奥比起奥运好似系 second class，容易啲，其实项目唔同，根本系无得比较，亦唔需要比较，因为去到奥运／残奥决赛，就系最高水平嘅赛事。正如家朗金牌难攞啲，定何诗蓓嘅银牌难攞啲，系无必要，因为佢地已经系喺自身项目上最 top 了。

两个奥运同样精彩

残奥运动员同奥运运动员一样，都系经历咗长年训练，比赛，需要喺奥运／残奥周期攞到一定积分，先可以出线，所以奥运同残奥嘅香港代表都系好努力先可以去到东京。

奥运同残奥系两个运动会，自 1988 年国际奥委会同国际残奥委会就达成协助，日后举办奥运嘅城市亦会同时举办残奥，就正如新嘅奥运格言：「更快、更高、更强，团结」（Olympic Motto: Faster, Higher, Stronger, Together），希望大家支持奥运嘅香港运动员，同样地都可以支持残奥嘅香港运动员。

残奥会将于 8 月 24 日至 9 月 5 日喺东京举行，香港将派出 24 名运动员出赛，大家都要 keep 住热情❤️‍