凹凸天文书 天文台人员声音导赏 盲人观星 用手「触摸天空」

心澄即明，唔好以为失去视力嘅人「睇唔清」，失明人士自有其方法感受世界。Emily早前碰到13岁起失明嘅莫俭荣，佢讲起佢有份创办嘅盲人观星营，今年已经去到第8届，听日同后日喺上水举行，一届比一届人多，约有2200人参与；今届更新增家庭营，鼓励伤残家长带健全孩子参与。

新增家庭营 鼓励伤健参与

莫俭荣跟Emily讲起，8年前受到朋友鼓励「失明不等于失去视野」，只要愿意，都可以克服困难欣赏大自然，于是同一班志同道合者筹办首届盲人观星营。佢回想当年不被看好，有网民耻笑「盲人点睇星」，莫俭荣其实唔介意一般人谂法，因为佢哋始终唔太理解失明者，反而系当年好多失明者都唔睇好，觉得「盲人无可能睇到星」，但佢坚持，结果活动成功，唔少失明者喺鼓励下作尝试，超越自己；另外又获有心人协助，如特别订购专供盲人触摸嘅凹凸天文图画书同一啲行星嘅模型，更有天文台嘅专业人员提供声音导赏，畀视障者用手「触摸天空」。

曾被笑「盲人点睇星」

除咗本地失明者，内地失明者都有来港参加，其中朱闵已是第5次参与，佢同Emily讲，话觉得活动令佢感觉被接纳，亦变得开朗。

其他伤残人士亦有参与，好似坐轮椅嘅温锦辉，佢过往会认为到郊外观星好艰难，而活动有义工协助，喺观星前帮手清理营地沙石及牛粪，方便佢哋以轮椅出入，过往锺意拍摄人像嘅佢，喺活动中认识好多摄影发烧友，更从佢哋身上学懂风景摄影，至今年已经系第4次参与观星活动喇。