中环出更：攀完狮子山 黎志伟：下一站摩天大楼

多年前因车祸而下肢瘫痪，绰号「包山王」嘅攀石运动员黎志伟，留医时为亲睹自己孩子出世，决定一洗颓风，从人生低谷再度出发，克服困难不断向目标迈进，而佢坐住轮椅都要攀上狮子山嘅经历更拍成电影添！

车祸致半瘫 为人父后洗颓风

黎志伟下一个挑战嘅目标就系香港嘅摩天大楼。但要完成呢个梦想，唔单止要有充足嘅准备，亦要事先徵得大厦业权人嘅同意，佢话正同相关对口单位商讨中，待有结果就会公布攀登边座摩天大楼。佢嘅坚毅精神，亦成为第六届青年梦想实践家嘅表扬对象。

王镇炎克服侏儒症 打羽毛球

残疾人羽毛球运动员王镇炎亦系得奖人之一。患上侏儒症嘅王镇炎，虽自小就热爱打羽毛球，然而身高较同辈友人矮咗一大截，唔公平嘅较量自然令佢屡屡输波，心灰意冷惟有埋首书本专心学业。后来佢遇上一位前港队球员，喺对方嘅鼓励下重拾童年梦想，加入残疾人羽毛球队接受训练，如今已进身单打世界排名第五，佢话同其他运动员一样，终极梦想就系四年一度嘅奥运会。

同场仲有失去左臂嘅岑幸富，坚持用义肢拉小提琴，而佢永不言弃嘅精神令业馀小提琴家林浩贤感佩服。

当晚恒生大学校长何顺文、青年梦想实践家协会会长陈永明、杰青吴俊霆同太太何淑玲都有出席颁奖礼。求学时期已经系电影迷嘅青年梦想实践家协会创办人暨主席李嘉俊，佢嘅梦想就系有朝一日能手执导演筒，亲手炮制属于自己心意嘅电影作品。为拉近梦想嘅距离，佢报读同电影相关嘅课程，又从事媒体科技以累积经验同资金，佢认为只要有决心同良好计划，就算要顾及现实生活，实现梦想亦并非遥不可及。