輪椅「車手」自己口罩自己縫

武漢肺炎肆虐，市民日排夜排，只為口罩，但對於出入不方便的輪椅人士，尤其長期病患者及長者，他們連排隊都有困難。自強協會肢體殘障人士及照顧者資源中心，近期收到會員求助表示，因為缺乏口罩，已超過10天沒有外出，亦開始糧食不足。項目主任葉偉強提到，該中心向來有提供縫紉維修服務，會員中有裁縫及縫紉師熟悉車衣，是專業「車手」，他們由上周四 （13日） 起決定自製抗疫布口罩，免費贈予會員及有需要人士。

自強協會肢體殘障人士及照顧者資源中心項目主任葉偉強期望，可於5、6周內縫製1000個布口罩，其後會繼續招募義工，持續縫製口罩贈予有需要人士。

「大家經歷過沙士，今次抗疫意識提高，口罩係外出活動必需品，政府連滿足市民需求都做唔到，甚至有人炒賣（口罩），我哋對政府供應無期望，唯有諗方法自救。」葉偉強坦言，中心本身只剩3盒口罩，但上周六有心人主動聯絡表示可以捐贈口罩，「佢之前都捐咗10萬個口罩，連普通香港人都做到急市民所急，政府點解令人咁徬徨，而且亦忽視無法排隊的市民，佢哋無出街，係咪當佢哋隱形？」

他以輪椅人士為例指：「除咗口罩，他們當中有部分需要消毒火酒、消毒紙巾清洗傷口。佢哋無口罩，必需品甚至糧食都買唔到。市民喺街排口罩，政府都處理唔到，輪椅人士嘅需要更hidden，佢哋唔講都唔知道，政府又點會知，所以近乎自救。點解社區有力量做到唔同嘅嘢， 政府咩都做唔到？」該中心透過本身的「區區有區長」計劃，由區長主動聯絡同區輪椅人士，才知道他們的防疫需要。

自強協會肢體殘障人士及照顧者資源中心成立已20年，為公益金及社聯會員機構，並沒有政府資助。中心提供不同服務包括：輪椅美工師，由義工 （健全及輪椅者） 免費維修輪椅及縫紉袋之類。「兩周前，見網上有自製口罩短片，雖然唔係醫療級數，但無口罩時，隔住飛沫塵埃都好；上星期四開始搵義工，星期五出第一個辦，但兩邊用防水物料好侷，今日 （17日） 試另一個辦，底層用布，外面防水料；都試過中間縫紉的，但易藏污。」

葉偉強表示，上周六已採購少量防水透氣物料，並透過社交媒體招募縫紉義工，期望第一階段縫紉300個口罩，目標是在5、6個星期内，縫製1,000個口罩，除惠及坐輪椅的會員外，亦計劃散落社區，贈予有需要人士。

退休前為裁縫的麗嫦，曾是照顧者，已過身的丈夫是中心會員。她是義工團隊中唯一的裁縫，主力出紙樣：「而家口罩缺乏，車嚟俾坐輪椅嘅人有得用，幫得就幫。」兩名輪椅「車手」阿金和少玲，雖然家住港島區，但花3小時交通往九龍灣啟業邨幫手亦在所不計。「（工序） 都幾難，未摸熟，試咗幾個款，立體嘅，靚就靚，要短時間生產就無可能；後來改良雙面防水好侷，第三個辦，底用布，中間『攝』防層紙，可以再用；另外諗埋車個套，用咗口罩放入個套度，唔使用紙巾。」少玲估計，1.5小時可車2個口罩或6個套。

為了趕製口罩，葉偉強提到，只要義務「車手」有需要，周六日亦如常開放中心，同時間有兩部工業衣車及兩部家庭衣車可用：「如果屋企有衣車，可以俾布料返屋企車。」附近居住的家庭主婦瞄瞄，她是健全義工，有車衣經驗。她說：「見到喺facebook 召集，就嚟幫吓手，而家摸索階段，應該唔太難。」

葉偉強透露，中心預計在周四 （20日） 把收集得來的外科口罩、消毒用品、搓手液、糧食，以及少量完成的自製布口罩，由義工分發到各區，上門贈予會員，先解燃眉之急。